ما هو السر وراء كروت الشحن و ازاى مبنعرفش نخمنها

بسم الله الرحمن الرحيم

محدش مننا مجربش يألف رقم لكارت شحن قبل كدة.. اعترف.. اعترف و محدش برضو عرف فى أي مرة من المرارير إنه يألف رقم و يطلع صح! طيب يا ترى إيه السبب فى الموضوع ده؟ هل شركات الموبايلات ذكية جدا للدرجة ولا إحنا اللي أغبياء زيادة عن اللزوم؟ 

الإجابة هى لا دا ولا دا 

انت عارف كروت الشحن اللي بتتكون من 14 رقم (فودافون و أورانج) ممكن يعملوا كروت بكام احتمال؟ الشركات دى ممكن تعمل 100,000,000,000,000 رقم مختلف للكروت! أيوة.. عندهم 100 تريليون احتمال و شركة كروتها 15 رقم زي اتصالات عندها 1,000,000,000,000,000 احتمال

( كوادريليون احتمال ) 

بالتالي صعب جدا جدا جدا جدا جدا جدا كمان مرة إنك تجمع عدد مكون من 14 أو 15 رقم و الرقم دا يصادف

رقم كارت شحن من اللي الشركة عملتهم قبل كدة! كمان لو افترضت إن كل مواطن مصري اشترى كارت شحن مرة واحدة فى حياته (و دا أقل من الواقع بكتير جدا)؛ هيبقى عندك 90 مليون رقم مثلا اتشحن قبل كدة؛ و لأن أغلب الناس اشتروا أكتر من كارت فى الكام سنة اللى فاتوا دول إذن هتلاقى إن نسبة كبيرة من الأرقام دى اتحطت فى كروت و اتشحنت قبل كدة؛ فتخيل الحظ الدكر يا مؤمن إنك ممكن تألف رقم و يطلع صح، بس يطلع رقم كارت مشحون قبل كدة! طيب هل الأرقام اللي بتلاقيها تحت الورقة اللي بتخدشها دى مرتبطة ببعضها بأي علاقة حسابية من أي نوع؟ الإجابة على سؤالك هي "لا و الله معرفش" انت بتزعق ليه يا عم؟ محدش يعرف، و محدش ينفع يعرف أصلا! 

طيب انت تعرف معنى إن الشركة يكون عندها Algorithm بتعمل بيها كروت الشحن، و الـAlgorithm دى تتسرب

لأي حد؟ تعرف الشركة ممكن تخسر كام مليار بسبب حركة زي دي؟! بس عموما يعنى الشركات دى بتعتمد على محركات توليد قيم عشوائية زي Java’s SecureRandom و الحاجات دى و معالجات ذكاء اصطناعي علشان تولد أرقام كروت الشحن عشوائيًا؛ و بالتالي تقريبا مفيش كائن حي يعرف القاعدة اللى بتتعمل عليها الأرقام دى، ولا نظام التسلسل بتاعها؛ و بكدة يبقوا بيطبقوا المثل اللى بيقول: "الحل الأمثل لتتغلب على قارئ أفكار هى أن تتصرف عشوائيا، دون أن تفكِّر فى أي شىء"

لذلك لو جبت أي عدد من كروت الشحن و حاولت تربطهم ببعض بأي علاقة جبرية أو منطقية

أو أي حاجة مش هتلاقي أي علاقة خالص! حتى لو اشتريت مجموعة كروت مع بعض استحالة تلاقى بينهم علاقة تسلسل أو أي حاجة من دى! أقول لك على حاجة كمان؟ أغلب الشركات زي Amazon مثلا، لما بتستقبل رقم كارت متفبرك بتفترض إن الكود دا محفوظ عند حد على الـCookies بتاعته و سهل يرجع بعد ما هم يعملوه و يدخله بكل سهولة؛ و بالتالي بتستبعده من القيم اللى سيرفراتهم بتولدها

اذا الخلاصة

- محدش بيعرف يولد أرقام كروت الشحن بسهولة، حتى موظفين شركات الاتصالات نفسهم المسئولين عن الكلام دا توليد الأرقام بيتم فى الغالب تبع خوارزميات معقدة بتتعمل عن طريق مولدات خاصة على أجهزة كمبيوتر خاصة بالموضوع دا بس!

- متزعلش لو معرفتش تألف رقم لكارت شحن و يطلع صح؛ لأن المفروض إنك متعرفش تألف رقم لكارت الشحن أصلا! 

- فى دول كتير لو تم ضبطك بتحاول تألف أرقام كروت شحن، بتتعاقب قانونيا بالسجن و الغرامة... زيك زي اللى بيسرق أي حاجة! فأنصحك بلاش 

noscript>>